kaise karoonga mai tumhare prem ka pratidaan priyatam?

saunpa dil, saunpa hai ye man, saunpa hai tumko hi jeevan
ab bacha kya? mai akinchan. doon tumhe ab kaun sa dhan?

door kar do tum hi mere man ka ye agyan priyatam...
kaise karoonga mai tumhare prem ka pratidaan priyatam?

dev hota to tumhe devatva ka uphaar deta
chandni ko chand se jo, wo vilakshan pyar deta.

per manu ka pootra tahra, kuchh nahi hai paas mere
bus liye baitha hriday me prem ka ahsas mere

umra bhar tujhe yaad rakhoon,do mujhe vardaan priyatam
kaise karoonga mai tumhare prem ka pratidaan priyatam...?